-97-གླེང་སློང་།སྤྱིར་ང་ཚོས་སྤྱོད་མུས་སུ་ཡོད་པའི་ས་དཔྱད་རིག་པ་ནི།ས་ལ་བརྟག་ཐབས་ཀྱི་རིག་པ་སྣ་རྐྱང་ཙམ་གྱིས་གྲུབ་པ་ཞིག་མ་ཡིན་པར།དེ་ནི་ཆུ་རྒྱུན་སུམ་འདུས་ཀྱི་གཙང་བོ་བཞིན་ལུགས་ཆེན་གསུམ་གྱིས་གྲུབ་པའི་གཞུང་ལུགས་ཤིག་ཡིན་ཞིང་།དམངས་སྲོལ་རིག་གནས་དང་།སྐར་རྩིས་རིག་པ།བཟོ་སྐྲུན་རིག་པ་སོགས་རིག་པ་དུ་མའི་ཕུང་བོ་དང་འབྲེལ་བའི་གཅིག་འདུས་ཀྱི་རིག་པའི་གཞུང་ལུགས་ཤིག་ཡིན་ལ།དེ་ནི་རང་ཅག་གི་འཚོ་བ་དང་དམ་དུ་འབྲེལ་བའི་སྤྱོད་སྒོ་ཆེ་བའི་གཞུང་ལུགས་ཀྱི་མ་ལག་ཅིག་ཀྱང་ཡིན།སྒོས་སུ་ས་ལ་བརྟག་པ་ནི་མི་རྣམས་ཀྱིས་རང་རང་གི་འཚོ་བར་འཚམ་པའི་རང་བྱུང་ཁོར་ཡུག་བཟང་པོ་ཞིག་འཚོལ་བའི་གོ་རིམ་ཡིན་ལ།སྣོད་བཅུད་གཉིས་འཆམ་མཐུན་མཉམ་གནས་ཡོང་བའི་ཐོག་མའི་ཆ་རྐྱེན་ཡང་ཡིན།དེའང་“རང་བྱུང་ཁམས་ཀྱི་བྱ་དངོས་ཡོད་ཚད་ཀྱི་བར་དུ་རྒྱུ་འབྲས་ཀྱི་འབྲེལ་བ་ཡོད་པར་ཡིད་ཆེས་བརྟན་པོར་བྱེད་པའི”①བསམ་བློ་དེ་ཉིད་རྨང་དུ་བྱས་ཤིང་།རང་བྱུང་ཁོར་ཡུག་གི་སའི་བཟང་ངན་དང་མིའི་བདེ་སྡུག་གཉིས་ཀྱི་བར་དུ་འབྲེལ་བ་ངེས་ཅན་ཡོད་པ་གཞིར་བྱས་ཏེ།སའི་བཟང་ངན་གཏན་ལ་ཕབ་ཚུལ་དང་རྒྱུ་བཟང་པོ་བླང་ཞིང་ངན་པ་སྤང་བར་བྱ་བའི་གཞུང་ལུགས་གལ་ཆེན་བོད་ཀྱི་ས་དཔྱད་རིག་པའི་བརྟག་ཐབས་དང་དཔྱད་ཚུལ་གྱི་སྐོར་གླེང་བ།ནག་བཟའ་རིག་འཛིན་ཚེ་རིང...
