-136-གླེང་གཞི།བཙན་པོ་ཁྲི་ལྡེ་སྲོང་བཙན་ཡབ་སྲས་ཀྱི་དུས་སྐབས་སུ།སམ་བོད་སྐད་ཀྱི་ལོ་ཙཱ་བ་དག་གདན་འཛོམས་ནས་ཆོས་གཞུང་བསྒྱུར་བ་ལ་ཉེ་བར་མཁོ་བའི་ལོ་ཙཱའི་རྩ་དོན་དང་སྒྱུར་ཐབས་བསྟན་པའི་གཞུང་དང་།ཐ་སྙད་བཀས་བཅད་ནས་གཏན་འབེབས་མཛད་པའི་མིང་མཛོད་ད་ལྟ་དངོས་སུ་མཐོང་བའི་སྒྲ་སྦྱོར་བམ་གཉིས་དང་སྒྲ་བྱེ་བྲག་རྟོགས་བྱེད་ཆེན་མོ་གཉིས་ཡིན་ལ།གཞུང་འདི་གཉིས་ཀྱིས་བོད་ཀྱི་ཡིག་སྒྱུར་ལོ་རྒྱུས་ཐོག་གི་གོ་བབ་གལ་ཆེན་ཞིག་ཟིན་ཡོད།དེར་མ་ཟད་བོད་ཀྱི་ཡིག་ཚགས་ཆེས་རྙིང་བ་དག་གི་མཇུག་བྱང་དུ་ཞུས་ཆེན་པ་དང་།ཡང་ཞུས།གཉིས་ཞུས།སུམ་ཞུས་ཞེས་འགྱུར་ཡིག་གཅིག་ལ་ཞུ་དག་པ་ཤིན་ཏུ་མང་བོ་འཁོད་ཡོད་པར་གཞིགས་ན།བོད་ཀྱི་ལོ་ཙཱའི་ལས་དོན་འདི་ཆེས་སྔ་མོའི་དུས་ནས་ལས་རིམ་དང་སྒྲིག་གཞི་འཐུས་ཚང་ཞིག་ཡོད་པའང་ཤེས་ཐུབ།འདི་དག་སམ་བོད་ཡིག་སྒྱུར་གྱི་ལོ་རྒྱུས་དང་གཞུང་ལུགས་ལ་འབྲེལ་ནས་དཔྱད་པ་བྱས་པ་ཅུང་མང་ལ།འདིར་བཤད་པར་བྱ་བའི་འགྱུར་སྐྱོན་བརྒྱད་ཅེས་པ་འདི་ཉང་ཆོས་འབྱུང་དུ་ཕྱོགས་བསྡོམས་མཛད་ནས་དངོས་སུ་བསྟན་ཡོད་ཀྱང་།དེའི་གོ་དོན་དང་སྐྱོན་སེལ་སྐོར་དཔྱད་པ་མཐིལ་ཕྱིན་བཏང་ཡོད་པ་ཞིག་ད་སྔའི་བར་མཐོང་ལམ་དུ་ཅུང་ཉུང་བས།ཆོས་འབྱུང་དེབ་ཐེར་ཁག་ཏུ་འཁོད་པའི་བོད་ཀྱི་ལོ་ཙཱའི་སྐོར་གྱི་ཡིག་ཆ་དག་ལ་རྩད་ཞིབ་བྱས་ནས་བོ...
